Ontmoet die Span

Leraars en Personeel

Petrie Spies

Senior Leraar

Dis 'n groot voorreg om aan die stuur te wees van hierdie wonderlike gemeente. Ek is getroud met Ermi en ons het drie kinders. Ek sê nie sommer nee vir 'n soetding nie en ek ontspan deur 'n goeie boek te lees of iets te doen in my tuin.

Jaques Kilian

Leraar

Saam met my vrou, Saloom, en ons twee dogters, Nadia en Melissa, is dit vir ons ‘n heerlike voorreg om deel te kan wees van hierdie gemeente.  Al is my heel grootste hartklop om die Bybel reg te lees en reg te verstaan, het ek altyd tyd vir ‘n potjie tafeltennis of skaak.

Jimmy Botes

Gemeente Bestuurder

Ek en Sonia is al 45 jaar getroud en ons het 3 kinders en 3 kleinkinders. Ek is al 16 jaar deel van die Baptiste span en ons probeer nog altyd om mense in nood te help. Die Here beplan vir jou voorspoed en nie teenspoed nie. HY wil vir jou ‘n toekoms gee, ‘n verwagting. (Jeremia 29:11-12. Ons help graag. 

Annette van Baalen

Kinderbediening

Ek is ‘n selfaangestelde dierefluisteraar, tuinmaker, rympie uitdinker, storiemaker en bakker van soet dinge. Ek bly op ons geseënde stukkie aarde saam met my liefdevolle man, ons pragtige seuntjie en ‘n hele werf vol stertswaaiers en verepoot kinders.

Willie de Beer

Tieners en Studente

Ek voel ons moet soms bietjie hardloop om dinge gedoen te kry daarom dra ek baie tekkies. Ek dink die golfbaan is ‘n goeie plek om die goeie nuus van Jesus te deel en ek love dit om met jongmense die lewe te doen al begin hulle meer en meer vir my oom sê.

Liesl Myburg

Pastorale Berader

Dit is vir my ‘n groot voorreg om namens die Here mense te kan help wat seer en stukkend is, sodat hul in Christus kan opstaan en in Sy oorwinning kan leef!!
Dan geniet ek baie die natuur, ek en my man Nico ry sommer gou vir die naweek weg om te gaan kamp! Ons seun Rico is al amper uit die huis, en Nicole is nog steeds styf, onder ons arms, deur haar doofheid en outisme het ons baie geleer van geduld, volharding, God se genade en Sy liefde!

Debbie Brink

Musiekspan Leier

Daar is niks wat my soveel vreudge gee as om mense nader aan God te bring deur musiek nie. Ek glo die Here raak ons op 'n spesiale manier aan deur die gawe van musiek om Sy teenwoordigheid te ervaar en Sy hartklop vir ons te hoor. Ek is getroud met Arend en ons het twee kinders en twee blou-oog huskies.
"Bless the Lord oh my soul!"

John van der Merwe

Media en Tegnies

Ek dink die lewe is beide te kort en te lank om nie elke dag 'n bietjie te lag nie! Ek hou ook daarvan om te weet hoe dinge aan die binnekant werk, en ek het 'n biblioteek van nuttelose, maar tog interessante feite in my kop, maar kan nie onthou waar my kar sleutels is nie... Niks is vir my lekkerder as om te sien hoe 'n idee in werklikheid verander deur die hulp van die mense rondom  my nie!

Talana von Solms

Fasiliteite en Ontvangs

Ek is hart, siel en verstand  lief vir die Here en ek leef om Hom te dien in alles wat ek doen.  Ek het die grootste deel van my grootwordjare in die groen land van Natal deurgebring  en is daarom baie lief vir die berge en natuur.  Ek kies graag koers op wandelroetes,   is passievol oor interieur ontwerp, lees  en geniet enige tyd van die dag  ‘n lekker beker koffie of romerige tee latté.

Belinda King

Assistent vir Pastorale Berader

Dit is vir my ‘n voorreg om by die beradingskantoor te werk, waar die Here die hoeksteen is van elke persoon wat ons hier bedien.  Ek glo wonderwerke gebeur nog elke dag rondom ons. Ek is getroud met Clive en ons het twee kinders en vier honde. Ek hou daarvan om in die natuur te stap en saam my gesin fiets te ry. Ek is ook baie lief vir lees en my stilste tyd in die dag is met sonsondergang. 

Liezel Pretorius

Assistent vir Senior Leraar

Ek is opreg en vriendelik en hou daarvan om te dien en te help. Ek geniet God se skepping (stap in natuur) en ook mooi stories (boeke of flieks) met ‘n boodskap en mooi musiek. Ek woon saam met my man en ons 3 pragtige dogters en 2 honde, ‘n kat en ‘n hamster.

Magda Diederichs

Skakelbord en Assistent vir Ds. Jaques Kilian 

Ek  is ‘n ma van 3 hondekinders, maar ek sou nie omgee om op ‘n  plaas vol honde en ander diere te bly nie, of om te werk met die rehabilitiasie van diere nie. Verder hou ek van regverdigheid, om mense met respek te behandel ongeag hulle agtergrond en om die natuur wat God aan die mens gegee het, te waardeer en te respekteer.

Marthlie Swanepoel

Assistent vir Gemeente Bestuurder

Ek is die oudste van drie dogters, gelukkig getroud en geseën met twee pragtige kinders. Ek hou van eerlikheid, al is dit soms hard en seer, en niks van onregverdigheid nie. Ek is ook ‘n koulike mens, dié dat Somer my gunsteling tyd van die jaar is en KOFFIE my gunsteling drankie.

Jaco Strydom

Sekuriteit en Algemene Instandhouding

Ek kan getuig dat God GROOT is, dat Hy regtig ons lewens in Sy hande dra en dat Hy ons plaas waar Hy ons wil gebruik. Hy het my in 'n werk geplaas waar ek vrede, liefde, vreugde en rustigheid kan ervaar en Hom daardeur die eer te kan gee. Na 15 jaar as gekwalifiseerde Grafiese Ontwerper in die "signage" bedryf, is dit vir my 'n voorreg om deel van die kerk se personeel te kan wees. Ek deel my lewe met my wonderlike vrou en ons het een dogter en een besige "draad" hondjie. 

Ben Mokheseng

Algemene Werker

Ben hou daarvan om mense se dag op te kikker met sy vriendelike glimlag en bereidwilligheid om te help waar okal hy kan.  Hy is mal oor 'n goeie grappie en het altyd tyd om te vra hoe dit gaan.  Sy grootste trots is sy twee dogters.

Abegaile Mkunyana

Algemene Werker

Abegaile, of "Abby", soos ons haar ken, se prag-stem kan gereeld in die kerk geboue gehoor word soos sy singend haar werk doen.  Sy's ouma van twee dierbare kleindogters, en een van die sagste mense wat jy ooit sal ontmoet.

Andries Tooi

Algemene Werker

Andries is al langer as 'n dekade werksaam by die kerk.  Hy het altyd tyd vir 'n geselsie, veral as dit gaan oor sokker, die vierde grootste liefde van sy lewe, na sy vrou en twee kinders.  As jy hulp nodig het met 'n taak, is Andries nooit ver nie.

Nouma Madonsela

Algemene Werker

Nouma is een van die vriendelikste mense wat jy sal ontmoet en is bietjie van 'n ma vir ons almal by die kantoor.  Sy kom van Koffiefontein en is die beliggaming van plattelandse gasvryheid.  Sy is getroud en het twee dogters op wie sy baie trots is.